Monday, January 6, 2020

మూడురంగుల జెండా (గేయం)

శీర్షిక: మూడురంగుల జెండా
రచయిత పేరు: పచ్చిమట్ల రాజశేఖర్
పల్లవి:
(మువ్వన్నెల ఈజెండా)
మూడురంగుల జెండా ముచ్చటైన మన జెండా
భరతావని యెదలనిండి రెపరెపలాడే జెండా
చ1.
తరతరాల బానిసత్వ సంకెళ్లను తొలగించిన
త్యాగధనుల గుండెనిండ
ధైర్యము నింపిన జెండా
చ2.
సైరికులతో సైనికులతో
సంప్రదాయ విలువలతో
ఆకాశపు అంచులలో
అలరారెను మనజెండా
చ3.
ఆసేతూ హిమాచలము అణువణువూ తడిసేలా
మానవతా పరిమళాలు
మదిపులిమిన మన జెండా
చ4.
అస్త్రశస్త్ర విలువిద్యలో ఆరితేరినా యోధుల
అహింసనే ఆయుధమై యలరారిన మన జెండా
చ5.
కులమతాలు వర్ణవర్గ విభేదాలు యెన్నున్నా
భారతీయసూత్రంతో బంధించిన మన జెండా

గోపులాపూర్ గ్రామం
జగిత్యాల జిల్లా
9676666353

Saturday, January 4, 2020

శీర్షిక: అంధుల బంధువు

(లూయీస్ బ్రెయిల్  జన్మదిన సందర్భంగా)


చిక్కులెన్నిటినో చిరునవ్వుతో చేధించి
చీకటిబతుకుల్లో చిరుదివ్వె వెలిగించావు
'అంధ'కారమగు అంధుల మోముపై
చిద్విలాసమై చిగురించావు

దారితెలియక పడబడు అడుగులకు
ఊతమై క్రాంతిపథం చూపించావు
చుక్కలలిపితో  చక్కని రాతనేర్పి
చూపులేని వారకు చుక్కానివైనావు!

Friday, January 3, 2020

శీర్షిక: మణిదీపం


ఉన్నతవర్గంలో ఉద్భవించి
అగ్రవర్ణంలో  మెరుగులు దిద్ది

దళితవాడలో
కటికదరిద్రంలో పుట్టి
మైలవడ్డ బతుకుల కడిగి
ముత్యాల జేసింది

అజ్ఞానపుచీకట్లు ముసిరిన
ఆదిహిందువుల అడుగులకు
దారిజూపే చేతిదీపమైంది

అగ్రవర్ణాల ఆధిపత్యాన్ని
దుష్టబుద్దిని దురహంకారాన్ని తూలనాడి తూర్పారవట్టింది!

మురికివాడల కంపుగొట్టిన
తాడితపీడిత బహుజనుల బాగుకొరకు
అవమానాల్నే అలంకారాలుగ
పిడికిలి బిగించి పోరాడింది!

పడగవిప్పిన బానిసత్వపు కోరలు పీకి
బడుగులఅడుగుల్లో అడుగై
అజ్ఞానపు బతుకుల్లో
అక్షరదీపం వెలిగించింది!
ఆదిగురువై నిలిచింది!

గజల్



ఊగిఊగి ఉయ్యాల ఉన్నచోటనే ఆగెను
ఎగిరియెగిరి నామనసు దేహగూటికే చేరెను

రేయింబవలు ఆశలకై తమకముతో చెలరేగిన
కలలుదీరు దారిలేక మదిన కలతలే చేరెను

సత్యమేదో తెలుసుకోక స్వార్థముతో దోచేసిన
ఏసంపదలెంటరాక వల్లకాటికే చెరెను

ఆలుబిడ్డలన్నదమ్ము లనుబంధము పెనవేసిన
ప్రాణము దేహమునువీడి పరమాత్మనే చేరెను

మేదినీలో మహిమలన్ని గాంచలేరు జన శేఖర
మాయపొరలు చీల్చుకొని మహితకనులనే చేరెను

(మేదినిలో మహిమలన్ని గాంచునులే కవిశేఖర
 మాయపొరలు చీల్చుకొని మహితకనులనే చేరెను)

Thursday, January 2, 2020

ఎడబాటు


చెలీ!
ఎడబాటు వేదిస్తుందనీ
చెలగి కన్నీరు కార్చకు!
మన ఈ ప్రేమాయాణంలో
నీకు నేనెంత దూరమో
నాకు నువ్వంతే దూరం
కాని చిన్న తేడా
ఎడబాటుకు ఏడ్చియేడ్చి
గుండెబరువు దించేసుకు
కుదుటపడుతావు నీవు!
ఎడబాటును అణచివేస్తూ
ఏడుపంత దిగమింగి
బరువెక్కిన గుండెతో
బతుకీడుస్తాను నేను!

ఆవేదనతో అవిసిన
గుండెనుసైతం గుడిచేసి
బండబారిన శిలపై
నీరూపసౌందర్యం నెరపి
నిన్నే ఆరాధిస్తా చెలీ!

ఆంగ్లవత్సరాది

కవితాలోకంలో విహరించే
కవివరేణ్య నెచ్చెలికాండ్రందరకు
'ఆటవెలది' తో హార్ధిక శుభాకాంక్షలు
ఆ.వె.
సఖియసొంటినూత్న సంవత్సరమువచ్చె
ఆలువంటి గతము అరగిపోవ
పాతనొదిలిపెట్టి కొత్తనా హ్వానించి
హాయి నొందు మిగుల సోయి మరచి

Tuesday, December 31, 2019

నడిచే దేవుళ్లు

అవనిపై నడయాడే అపర దేవతారూపాలు
మన ఆశలుదీర్చే అమృతభాండాలు
చెమటను చమురుగజేసి సత్తువంత వత్తిజేసి
మన బతుకున వెలుగునింప  కరిగిపోవు దీపాలు
వారిఆశల నణుచుకొని వారసుల భవితను కలగంటారు
నీ యెదుగుదలకు అట్టడుగున నిలిచి పునాదవుతారు
నీఓటమి తాలూకు వేదనకు బాసటవుతారు
నింగికెగసిన నిన్నుచూసి పొంగిపోతారు
భంగపాటును చూసివారు కుంగిపోతారు
జగతి నిన్ను ప్రశంసిస్తే హర్షిస్తారు
నీఉనికిని విమర్శిస్తే వర్షిస్తారు
రెక్కవిదిల్చి మనమెగిరిపోతే మదన పడుతారు
మళ్లీమళ్లీ త్యాగాలకు ఒడిగడుతారు!

రాజశేఖర్ పచ్చిమట్ల
31-12-19