అమ్మతనమె అమృతమై ఆయువుపోస్తున్నదీ
అమ్మతనమె అఖండమై యవనిని మోస్తున్నదీ
అమ్మతనం అంకురమై యవని నిలుపుతున్నది
మృగమైనా తనకూనల మురిపెముతో పెంచును
కాకైనా తనబిడ్డల కనురాగము పంచును
అమ్మసాటి ఈజగతిల అగుపించదు వెదికినా
అమ్మదనం జగతిలోన అమృతమే తెలుసునా
చక్రవాకమై నిత్యం తపిస్తుంది అమ్మతనం
తొలకరికై వేచివేచి కృశిస్తుంది అమ్మతనం
అమ్మతనమె ఈజగతిని మోస్తున్నది వరాహమై
అమ్మతనమె అంబరాన
పూస్తున్నది హరివిల్లై
అమ్మప్రేమలేనిదే మనిషి ఉనికి లేదుగా
అమ్మమెప్పుపొందనీ మనిషిబతుకు దండుగా
అణువణువు తనకు అర్పించిన అమ్మఋణం తీరునా
బతుకంత దార వోసినా అమ్మఋణం తీరునా
అమ్మేగద అనురాగం అమ్మేగద మమకారం
అమ్మప్రేమ పొందడమే మనజన్మకు సింగారం
No comments:
Post a Comment