Friday, May 29, 2020

గజల్ - తావిలేని పూలు

తావిలేని పూలనెలా ధరించెదవు ఓ నరుడా!
ఈవిలేని మనిషినెలా భరించెదవు ఓనరుడా!

వలపులేని వయసుపుఢమి వరపుధార వరిస్తుంటే
మనసులేని మనిషినెలా భజించెదవు ఓనరుడా!

కలువలెన్నో కొలువుదీరు కొలనుచూసి యెదనుమురిసే
కలువలేని కడలినెలా ప్రేమించెదవు ఓనరుడా!

అల్లుకున్న అనురాగపు తీగెలలో తీపిగ్రోలి
శుష్కమైన సంతునెలా పోషించెదవు ఓనరుడా!

పచ్చదనపు ప్రకృతంత రాగమొప్పు రాజుకరము
విలపించే విపనినెలా సుఖించెదవు ఓనరుడా!

పచ్చిమట్ల రాజశేఖర్

గజల్ - యెదతలపులు

మనసులోని జ్ఞాపకాలు కరిగినాయి కన్నీరయి
అంతులేని అశలన్ని చెదిరినాయి కన్నీరయి

మూగవోయి మౌనంగా యెదగదిలో కుములుతుంటే
మనస్నేహపు తలపులన్ని పొంగినాయి కన్నీరయి

ఓదార్పుతొ భుజంతట్టే హృదయం మరుగవుతుంటే
మదినంటిన మలినాలు చెలగినాయి కన్నీరయి

మంచితనం వంచితమై కనుదోయిన మెదులుతుంటె
తాలలేని వ్యథలన్నీ  పెనవేసినాయి కన్నీరయి

అమావాస్య చీకట్లు రాజుమదిని నిశిజేసిన
కన్నులలో వెన్నెలలు విరిసినాయి కన్నీరయి

Thursday, May 21, 2020

సమస్యా పూరణం

సమస్య- అక్కను పెండ్లాడె మిగుల ననురాగమునన్

మక్కిన మామిడి వోలెను
చక్కని సౌరుల్ గలిగిన సరసిజ నేత్రిన్
దక్కిన వరముగ  మిత్రుని
యక్కను పెండ్లాడెమిగుల ననురాగమునన్

Sunday, May 17, 2020

నరోద్భవఫలం(సీసం)

నరులంట పుఢమిపై! నవతరించిన నుండి
ప్రాణికోటికినంత! హానివచ్చె

మనుషులీమహిలోన! మనుగడొందిననుండి
చెట్టుచేమలకంత! చీడవట్టె

బుద్దిజీవులిలలో! వృద్ధిజెందిననుండి
ప్రకృతంతనువెలసి! వికృతి యయ్యె

నరసంతతిలలోన! నడయాడినానుండి
యేరులన్నియునెండి! యరుగులయ్యె

ఉత్తతోలుబొమ్మ!  హృదయమన్నదిలేదు
పాపభీతిలేని! పాతకుండు
భూతదయయులేని! భూతమీ మనుజుండు
నరునితోటె సర్వ!నాశమయ్యె

Thursday, April 9, 2020

కరోనాపై పద్యం

సీసపద్యం:1

నీకున్న సంపదల్! నీవెంట రాలేవు
తాడుగట్టినయాలు! తోడురాదు

నీకన్నబిడ్డలు! నినుజేర రాలేరు
తల్లిదండ్రులునిన్ను! తాకరారు

బంధుజనులుబాధ ! పంచుకొనగరారు
చిన్ననాటి మిత్రులు! చేరరారు

చుట్టమనెడువారు! చూడనెవ్వరురారు
పలుకరించనురారు! పక్కవారు

ఎంతమందీనీకు! సొంతవా రుండినా
సేవజేయదరికి! నెవరురారు
ఒంటి పీనుగువయ్యి! వెంటనెవ్వరురాక
కరొన సోకనరులు! కాటికేగు

సీసపద్యం:2

వైద్యులె దేవులై! వైరస్సు బాపంగ
ప్రాణములకు తెగి! పాటుపడిరి

పోలీసు బలగాలు! పోరాట పటిమతో
సర్వకాలములోన! సడకు గాచె

పారిశుధ్యపువారు! పరిసరాలన్నింట
మలినములనుబాప! మథనపడిరి

ప్రభుతపాలకులంత! ప్రజలశ్రేయముగోరి
చేయికలిపిరంత! సేవజేయ

ఇంటయందునుండి నినునీవు గాచుకో
బాధ లొంద బోకు బయట కొచ్చి
స్వస్తమొందనీవు స్వస్తయౌ లోకమ్ము
లక్షపెట్టకున్న రక్షలేదు


Sunday, March 29, 2020

చెట్టు - తోబుట్టు

పేరు. రాజశేఖర్ పచ్చిమట్ల
        గోపులాపూర్
        జగిత్యాల .జిల్లా
        9676666353

శీర్షిక:

1.సీసపద్యం:
పుడమి తనువుచీల్చి పుట్లుపుట్లుగ మొల్చి
ఆకుపచ్చనివస్త్ర మవని కొసగు

అహరహమ్ము వెరిగి యలరారి వనములై
పశుపక్ష్య ములకంత వసతి గూర్చు

మనుజలో కముకంత మలయమారుతమిచ్చి
కమనీయ ఫలముల కడుపు నింపు

అంబరమ్మునసాగు యభ్రమ్ము లనుబిల్చి
అవనిదాహము దీర్చ నంబువొసగు

ప్రాణవాయు వొసగి ఆయుర్దాయముబెంచి
కూడు గూడు నొసగు కూర్మి తోడ
అఖిల ప్రాణి కోటి కాధార భూతమౌ
మొక్క నాటవోయి ఒక్కటైన

2.సీసపద్యం:

సాళ్లుసాళ్లుగనిల్చి స్వాగతమ్ములు బల్కి
ఛాయనిచ్చి మిగుల హాయి గొల్పు

అలసి వచ్చినవారి బడలికన్ దీర్చేల
మలయమారుతమిచ్చి మరులు గొల్పు

ఆకొని దరిజేరు యతిథిసంతుష్టికై
మధురఫలములిచ్చి మమతబంచు

సకల రోగములకు  స్వాంతన మ్మొసగేల
ఔషధ మ్ములనిచ్చి స్వస్త తొసగు

కన్నతల్లి వలెను కడుపు నింపుడెగాక
కామితార్థమొసగు కల్పతరువు
మనిషి మనుగడూంచు మహిత శక్తి తరువు
మొక్కనాటవోయి ఒక్కటైన!

హామిపత్రం:
     ఈపద్యములు నాస్వంత రచనే తప్ప దేనికీ అనువాదము కాదు. దీనిని ఏగ్రూపులో, ఏ పుస్తకంలో ప్రచురించలేదు.
ఈపోటీకొరకే రచించితిని.

Saturday, March 28, 2020

మా'నవ' నైజం


~~~~~~~~~~~~~
కరువుకోరల్లో చిక్కిన లోకంలో
బతుకుదెరువు భారమైనపుడు
నూకలకై వెదికేదొకరైైతే
రూకలకై వెదికేదొకరు
ఒక్కోచేపకు గాలమేసి నిరీక్షించి నీరసించి
దొరికినదాన్ని దాచుకుని మురిసేదొకడు
దాచినసంచికికూడ దెల్వకుండ లేపేసేదింకొకడు
చిన్నచేపను పెద్దచేపలు మింగే విషసంస్కృతిలో
గద్దల ఆకలిదీర్చ కాకులదరిమే లోకంలో
ఎన్నెత్తులువేసి ఎంతెత్తుకెదిగినా
మనిషికావల్సింది జానెడు పొట్ట
మూరెడు బట్ట
ఆరడుగుల నేల!

రాజశేఖర్ పచ్చిమట్ల
జగిత్యాల
9676666353