మాపెళ్లిరోజు

మూడుముళ్లు
ఏడడుగుల బంధంతో ఏకమై
తనువున తనువై
మనమున మనమై మెలుగుతూ
సహధర్మచారత్వ భాగస్వామియై
వంశవృక్ష నవపల్లవోద్భవధాత్రియై
అనుబంధాల కాలవాలమై
ఆత్మీయానురాగాల నెలవై
పుట్టినిల్లు మెట్టినిల్లుల నడుమ
ఆసువోస్తూ అల్లిన
అనుబంధపు వారధై
పెనవేసుకున్న ఆత్మీయబంధాల
లతలపొదరింటి పాదు తానై
దినదిన ప్రవర్దమాన
అష్టైశ్వర్యాలకు నెలవై
నాతో కలిసి నడుస్తూన్న
లావణ్య శేఖర శోభిత
నా జీవితభాగస్వాయైన శుభదినం !
మా ఇంటిల్లిపాదికి పర్వదినం !!

(09 ఏప్రిల్ 2010 మేమిరువురమేకమైనరోజు)

అందాల భామకు అశృనివాళి

అందానికి నిర్వచనం 

అభిమానానికి ఆలవాలం 

చిరు నగవు చిరునామా 

నిత్య యవ్వన నింగి భామా 

అందానికి ఆహార్యం జోడించి 

లాఘవ లావణ్య లాలిత్యం తోడ 

బాల నటి మొదలు బాలీవుడ్ వరకు 

అభిమాన కోటి మనస్సుల్లో 

చెరగని  ముద్ర వేసిన  వెన్నెల భామ 

సుందర సుమధుర భావాలను మేళవించి

నటనకే నడకలు నేర్పి

చిత్రసీమలో చిరస్థాయిగా నిలిచి 

భువి నుంచి దివి కేగిన  చిరయశస్వి శ్రీ దేవి!

అప్సర కంటకు అశ్రునయనాలతో భూలోకపు నిమంత్రణం !

ఇంద్రపురి దేవాంగన లోకం నీకు పలికింది ఆమంత్రణం  !!

సుతులు - గతులు

సుతులు గల్గు వారు  గతులు వడిసెదరు 

సుతులు లేని యెడల గతులు లేవు 

సుతులు గతుల నునవి  సృష్టించి నదెవరో 

పచ్చిమట్ల మాట పసిడి మూట 

తెగిన మోకు

వేకువనే లేస్తవు వేదపండితునోలె
స్నానజపము లేక సాగిపోతవు
పొద్దువొడిసేటాల్లకు పొలిమేరలు దాటి
తాటివనంలోన తచ్చాడతవు
బతుకుదెరువుకోసం వ్యథలువడతవు
సాహసమే ఊపిరిగా సాగుతుంటవు గౌడన్నా !

మోకు బుజానేసి ముత్తాదు గట్టుకొని
వీరునోలె ముందుకేగి విజృంభించి
ఎత్తైన తాటిచెట్టు ఎగాదిగా జూసి
మొద్దుకు బంధమేసి మొగులుకెగబాకి
పచ్చనాకులంట పాకి పరవశిస్తవు గౌడన్నా!

 తనువు అణువణువు ఆత్మవిశ్వాసంతో
మోకుమీద నమ్మకంతో మొండిగ చెట్లెక్కి
సుతారంగ గొలనుగీసి సురపానము సృష్టించి
శ్రమజీవుల బడలికబాపు ధన్వంతరి నీవు గౌడన్నా !

వృత్తి నిడిసి మనలేవు వృద్దాప్యం నొందలేవు
పొద్దంత పనిజేసిన పొట్టకూటికి కరువు
నిరంతర పోరాటం ఆగదు నీ ఆరాటం
దినదిన గండం నీ బతుకు చిత్రం

అల్లిన మోకు  సంకలుంటే  ఆకాశంలో నీవు!
మోకు జారిన మరుక్షణం పుడమి పొత్తిళ్లలో నీవే ! !
తలపాగతో తాడుశిఖల ఉదయించే సూర్యుడవు !
తాడుతెగిన తదనంతరం అస్తమించే భాస్కరుడవు !!

చెరవీడిన బాల్యం !

పసిప్రాయపు పసిడి బాల్యానికి
ఊచల్లేని చెరసాల పాఠశాల
బడికి సెలవులంటే
యావత్ జీవశిక్షనుంచి
విడుదలయిన ఖైదీల్లా
పంజరం చెరవీడిన
సీతాకోక చిలుకల్లా
బోసినవ్వుల పసిహృదయాలు
రెక్కలు విదిల్చి ఎగిరి గంతేస్తాయి.
గతస్మృతులను నెమరువేసుకుంటూ
పల్లెకు పయనమవుతాయి !
తాతయ్య నాయనమ్మల తలపులతో
నెయ్యపు దారుల వెంట స్వేచ్ఛా విహంగాలై
పల్లెఒడిని చేరి సేదతీరుతాయి !
నవ పల్లవాగమం తో పండుటాకులు పరవశిస్తాయి
కల్మషమెరుగని నేస్తాలను కని హాయిగా నవ్వుకుంటాయి
మైమరచి ఆడుతుంటాయి పాడుతుంటాయి

భూతమే భావికి పునాదిగా
పసితనపు బాల్యానికి
ముదిమి ముసిరిన బాల్యపు
అనుభవాల నపురూపంగ అందిస్తూ
భవితను భద్రపరిచే ఊసులు  నీతులు
సంస్కృతి సంప్రదాయాలను
చందమామ కథలుగా చెవినేస్తూ
పండుటాకులు పల్లవములతోడ
ఊహల్లో విహరిస్తూ
ఆనందపు అంచుల్ని తాకుతూ
ఆడి పాడి ఆదమరిచి నిద్రిస్తాయి !

ఆకుపచ్చని ఆహ్లాదాన్ని  అందరికందించేలా
పచ్చని పొదరిల్లని ప్రకృతికందించిన తల్లివేరు
పరోపకారంతో తానెదుగుతుంటే
తన్మయత్వంతో మురిసిపోతుంది !

వలసపక్షుల పునరాగమంతో
పులకించిన పల్లె ఒడి
ఆనందాల లోగిలి
అనుబంధ లతలతో
ఆప్యాయతలు పెనవేసుకున్న  పందిరి !

చెలిమి చిరునామ చందు

 (ఆత్మీయ మిత్రుడు     మటేటి చంద్రశేఖర్ కు హార్థిక శుభాకాంక్షలతో)

స్నేహానికి నెలవై
ఆత్మీయత కాలవాలమై
అందరికాదర్శప్రయమై
మిత్రకోటికి ఆప్తుడవై
అందరి ఆదరాభిమానాలతో
అహర్నిశలు శ్రమిస్తూ
అంచలంచలుగా యెదిగి
స్నేహ పరిమళాలు
సర్వత్ర వ్యాపింపజేస్తు
అశేష నెచ్చెలుల కాదరువై
నిత్యం చిరునగవులలరించిన
ప్రసన్నతామూర్తి
చెలిమికి చిరునామయై
మెలిగే చిన్ననాటి నేస్తానికి
 హృదయపూర్వక శుభాకాంక్షలతో ........

                   కవిశేఖర

ఇల్లాలు

సంసారపు బాధలనీదలేక
సతమతమౌతున్న పెనిమిటిజూచి
నిండ నీటితో భారంగా
కదులుతున్న మేఘమై తిరగాడుతూ
నిత్యం మోముపై చిరునవ్వుల నంటించుకొని
ధైర్యం సాకారమైనట్టు కనవడుతూ
గాలి ఆప్యాయతకు కరిగి
భారం దించుకున్నట్లు
చాటుగా కన్నీరు కార్చి బాధను దించుకొని
మేకపోతు గాంభీర్యంతో
భర్తకు వెన్నుదన్నై నిలుస్తుంది భార్య!

నెలవంకలను నేర్పుతో అద్దిన
ఆరు గజాల అతుకుల చీరతో
తనువు మసక బారుతున్న
చిరుదరహాసము చితికి పోనీకుండ
వెన్నెలయి వెలుగుతుంది వెలది !

అంతఃపుర మంత ఖాళీయై
వంటింట్లో ఒంటరిగానున్న వేళ
తనో కన్నీటి చెలిమైతది
తన హృదయంసుడులు దిరిగే సంద్రమైతది
అయినా
భర్తకు బాసటగ నిల్చి భరోసానిచ్చి
సంసారనావకు తెరచాపై
దూరపు తీరాలు దరిజేర్చు
దారి జూపుతుంది దయిత !

మనసంత సమస్యల
నిలయమై కలవరపెడుతున్నా
ఆత్మాభిమానం అణువంతైన చేజారనీక
ఆత్మస్థైర్యాన్ని కూడగట్టుకొని
ఇంటిగుట్టు బయటపడకుండ
గుట్టుగా సంసారం సాగించే
     సహనమూర్తి ఇల్లాలు !