నైరాశ్యం(గజల్ )

 చీకటినే దుప్పటిగా కప్పుకుంది హృదియెందుకో

కలలనేటి విరులకోటి విచ్చుకుంది మదియెందుకో

తెలివాకిట రవికరములు గిలిగింతలు పెడుతున్నా

జ్ఞాపకాల పాన్పుపైన పడుకొనుంది తనువెందుకొ

చెలికూజిత స్వరములేక మూగదైన యెదవీణియ

అలుపులేని మగతనిదుర నలుముకుంది హృదియెందుకొ

మిథునమయ్యి  యలరించిన క్రౌంఛమంటి కనుదోయిని

తనురాలిన ఆగతమ్ము పులుముకుంది భవితెందుకొ

నందనమై వలపులొలుకు రాశేఖరు మదిగదిలో

నిశిరాతిరి తిమిరమెంతొ పరుచుకొంది భావెందుకో