రుబాయీలు

నువ్వులేకనేను లేననుకున్నాను

నువ్వేలోకమని అనుకున్నాను

నాయెదదాటి తనువంతా నీవల్లితె

నాఉనికే శూన్యమని యెరుగకున్నాను. - 1

ఆడపిల్లను ఆదిలక్ష్మిగ భావించారు

ఆడపిల్లను అదృష్టదేవతగ భావించారు

అయినా అవని నలుమూలల యెందరో

ఆడపిల్లను అరిష్టముగా నిందించారు - 2

వసంతమై బతుకుబాటలొ పచ్చికపరుస్తావనుకున్నా

శరత్తువై జీవితాన వెన్నెలలు విరబూస్తావనుకున్నా

భీష్మించిన తాపముతో గ్రీష్మానివై క్రీడించి

శిశిరమై చిగురాశలు రాల్చుతావని యెంచకున్నా - 3

తనువే సత్యమని వలచితినేను

ధనమే నిత్యమని మురిసితినేను

ముదిమితో తనువు అలిసిన వేళ

అంతా మిథ్యయని తలచితినేను - 4