గజల్ స్నేహపరిమళం

అందమైన బంధమయ్యి అవతరించు రా చెలిమి

అవరోధాలెరుగకుండ ఆగమించురా చెలిమి ॥2॥

పేద ధనిక భేదాలను యెంచబోదు ఆబంధం

స్వార్థమన్నదే యెరుగక కొనసాగించు రా చెలిమి

కులమతాలపట్టింపుల కొలతమరచి కలుపుకుంటు

మానవతే పునాదిగా అంకురించురా చెలిమి

కలిమిబలిమి రంగురూపు లెంచకుండ తోడుండి

మంచితనమె భూమికయై యలరించురా చెలిమి

కవిశేఖరు గుర్తించిన కండబలమురా చెలిమి

సంకుచితకు తావియ్యక ఉద్దరించురా చెలిమి