చందమామ గజల్

 ఆకసాన అందమై యలరింది చందమామ

ఈధరణి చీకట్లను తరిమింది చందమామ

తనకిలలో సాటిలేక తనకెవ్వరు పోటిరాక

అనదినమ్ము అలుపులేక ఎదిగింది చందమామ

అమావాస్య నిశీవ్యథలు అమాంతమ్ము కప్పేసిన

తొలివెలుగులు పొందేందుకు తపించింది చందమామ

వెలుగులన్ని నీరసించి ఆనవాలె కోల్పోయిన

తిరిగివెలుగు పులిమేందుకు భరించింది చందమామ

తనువునిండ వెలుగులుంటె ఆహార్యమె కవిశేఖర 

రవికిరణపు వేదనెంతొ భరించింది చందమామ