ఆశావాదం గజల్

 దరిచేరని గమ్యానికి దిగులెందుకు నేస్తమా

కాచుకున్న కష్టాలకు వెరపెందుకు నేస్తమా

శిశిరంలో రాలితేనె వసంతమై పూస్తుందీ

చేజారిన విజయాలకు చింతెందుకు నేస్తమా

పాలకడలి విషమువెనుక అమృతపొంగు పొరిలినదీ

ఫలితముకై రేబవళ్ళు కలతెందుకు నేస్తమా

వెలుగువెంటె చీకట్లూ నిశిదాటితె ఉషోదయం

కృషిచేసిన వృధా కాదు గుబులెందుకు నేస్తమా

సరసుశిరసు మాడితేనె మబ్బులయ్యి కురిసేదీ

మార్పుకోరి నడిచేందుకు బెరుకెందుకు నేస్తమా

ఉలిదెబ్బల కోర్వకుండ శిలలువెలుగు లీనవుగా

విజయాలను చేరలేని నడకెందుకు నేస్తమా

గమ్యమెంత కష్టతరమొ కవిశేఖరు డెరుగునులే

అడుగుముందు కేసినడువు అలుపెందుకు నేస్తమా

దీపావళి గజల్

 ప్రమిదలాగ వెలగాలని సాధనలే దీపావళి

తిమిరమంత తొలగాలని బోధనలే దీపావళి

సెగలురేపు చలిమంటల గిలిగింతలు పెట్టువేళ హిమసహితపు సంధ్యలన్ని వేదనలే దీపావళి

మనచుట్టూ నేడుకూడ అసురలింక ఉన్నరుగా

మనసునంటు రాక్షసగుణ భేదనలే దీపావళి

బతుకంతా తిమిరమోలె కష్టాలే మసురుతున్న

ప్రమిదవయ్యి వెలగాలనె బోధనలే దీపావళి

అమవసనిశి అమాంతమూ కవిశేఖరు కమ్మజూడ

దారిద్ర్యము బాపునట్టి శోధనలే దీపావళి

రాజశేఖర్ పచ్చిమట్ల