గజల్ - శివనివేదన

ధీనజనుల దరికిజేర్చి కరుణబ్రోవరా శివా
భక్తవరుల చెంతనిలిచి వరములీయవా శివా

అహర్నిశలు నీనామమె నామదిలో అలలాయె
నాహృదిసంద్రపు ఘోష దీర్చి మదినిలువవా శివా

తేజరిల్లు కనుదోయితో నీరూపము చూడనయితి
కలనైనా కనిపించి కలతబాపవా శివా

తల్లిదండ్రి నీవేనని నీసేవలొ మునిగితిని
మోక్షపథము నొనగూర్చి ముక్తినీయవా శివా

భవబంధపు జీవితాన 'శేఖరు' బాసటనిల్చి
నీతనువున విభూదిగా నిలుపుకోవా శివా