Tuesday, September 12, 2017

కలం యోధుడు ( కాళోజీ )

అమాయకత్వం ఆసాంతం నిండిన తెలంగాణలో
చైతన్య దీపికను ప్రసరించి
అణగారిన వర్గాలకు అక్షరజ్ఞానం
అందని ద్రాక్షే ఐన రోజుల్లో
పాలక భాషా పఠనం గావించి
ఉర్దూతో ఔన్నత్యం సాధించి
తెలుగు నుడికారము నొంట బట్టించుకొని
కన్నడ మరాఠాది భాషలపై పట్టు సాధించినా
మాతృభాషా మమకారం వీడలేక
వచన కవితలో వాడుక భాషను జొప్పించి
ప్రజల భాషకు పట్టం గట్టిన ప్రజాకవి కాళోజీ !

రజాకార్ల రాక్షసత్వం
నలుగుతున్న తెలగాణను
కవితలతో కనువిప్పు గలిగించి
బానిసత్వపు బాధలు బాపుటకు
ఉద్యమమే ఊపిరిగ బతికిన
                       సంఘ సంస్కర్త కాళోజీ  !!

అరచాకాలకు అడ్డలుగ నిలిచిన
దొరల గడీలు
వెట్టిచాకిరికి నెలవైన దొరతనం
దొరల అడుగులకు మడుగులొత్తె
భూస్వామ్య వ్యవస్థల భూస్థాపితంజేయ
కలమే కరవాలంగ యుధ్ధం జేసిన
                      కలం యోధుడు కాళోజీ !!!

నిజాం వ్యతిరేక స్వరంలో
పాలకుల ప్రవృత్తిని
తూర్పార బట్టిన సాహసికుడు
సమసమాజ స్వాప్నికుడు
రాజకీయ సాంఘిక చైతన్య సారథి
విగ్రహారాదన ను నిరసించిన అభ్యుదయ వాది
కవితా పరవళ్లతొ కలకలం రేపిన కలం యోధుడు
బానిససంకెళ్ల విముక్తికై విజృంభించిన విప్లవకారుడు
సామాన్యుడి హక్కులడిన ప్రజలమనిషి
తెలంగాణ దశను దిశనూ మార్చిన మార్గదర్శి

అక్షరావేశపు మేళవింపు తో
జాతిని జాగృత పరచిన నిత్య చైతన్యశీలి !
తెలగాణ గొడవను తన గొడవగా యెంచి
పలుకుబడులకై పరితపించి
నీ భాష యాసలల్లనే బతుకున్నదని
  చాటిన కాళోజి
     చిరస్మరణీయుడు !
        సదా వందనీయుడు !!



No comments: